১.
দরজা খুইল্লা উবাই
শীতর হাওয়া আমারে ছইয়া যায়
কত দূর থাকি ই হাওয়া আয়, জানি না
কত দুর আমার চউখ যাইত চায়
ইতা ভাবতে ভাবতে বেইল পুরায়।
হাওয়া ঘরো ঢুকি পড়ি থাকে
বিছনাত গড়াগড়ি করে,
আমার শরীল ধইরা নাচতে নাচতে
নাই অইযায়, আর
আমি উড়ি উড়ি সাকিন খুজি ।
কই থাকি ই হাওয়া আয়।
২.
কে উবাইয়া ডাকে আমারে
দুরই থাকি, ইশারায়,
দরজাত তালা নাই
লাগে আমার মন যাই যাই করে
আমি বুঝি না
কেনে ইলা দিন আমার যায়।
৩.
আমি গাছর বায় চাই
দেখি কউচ্ছা পাতা লতা লটকি আছে,
মনো অয় আমিও যাই
তারার লাকান আসমানোর গাওত
লটকি লটকি ঘুরাত থাকি!
ইতা দিন পরবাস অইগেছে
আইলর ঘাস
পথর কান্দাথ ফুল
মুড়াইল আশি লাগা ঢেউ
আমারে তইয়া কই গিয়া লটকি আছে।
৪.
আতও বেইল নাই
উঠানোও
পাও লইয়া পড়িগেছি
অলা মনে অয়
তুমি কত দূর থাকি আইলায়
ঘরো মধু নাই
আমি শরম মুখে মাততে আছি
তোমার খোজ নাই।
বোনাস: সিলেটি ভাষায় প্রেমের কবিতা
লাগের হাওয়াত তোমার গন্ধ পাই
যে হাওয়া আমারে ছইয়া যায়
মনো অয় তার খরে খরে আমি ঘুরি
মনো অয় ঘুরতে ঘুরতে তোমার জানালত উবাই
ইলা দিন আমার নাই আর
তবু মনো অয় হাওয়া যদি তোমারে ছইয়া আয়
আমি মাতাল মাইনশর লাখান উড়তে থাকমু
হাওয়া যদি তোমার গন্ধ লইয়া আইত
দিন রাইত হাওয়ার লগে তোমার মাত অও মাত্তাম।
২.
কেনে আমি দূরই দূরই থাকি
তোমার ছায়া থাকি
তোমার মায়া থকি
ইলা অবুঝ কেনে আমার হৃদয়।
৩.
মনো অয় হিব্বার তোমার মাত হুনি
গাছর পাতারা যেলা দুলতে দুলতে মাতে
ঝড়র রাইত
যেলা স্বপ্নর ঘোরে উঠ পাখি উড়ে
তোমার মাত হুনতে হুনতে আমি বুঝি উড়ি।
দূর থাকি হুনা যায় কত কত গান
কত কত পাখি গাইতে গাইতে যায়
ইলা শব্দ কই আমি পাই
তোমার মাতার সুরে যেলা মাতাল অই।
৪.
দুনিয়াত কত ফুল ফুটে
সকল ফুলর থাকি তোমারে সুন্দর লাগে।
৫.
হিলা দিন কই গেল আইজ
খোয়াব তুমি আর নাই
ইলা কেনে আমার লাগে
হাওয়াত তোমার গন্ধ পাই।
৬.
যেলা সর্নলতা লটকি থাকে
লাগে তুমিও আছো
আমার চাইরো বায় তোমার মায়া ভরা চোখ
যেবায় চাই, যেবায় যাই
দেখি তোমারে,
আমি আটতে গেলে আটিনা
পড়তে গেলে পড়িনা
লাগে টাল মাইনশর লাখান
তুমি সর্নলতাত লটকি আছি।
©বেলায়েত মাছুম
ওল্ডহাম/২০২৩
আরো কিছু সিলেটি কবিতা-
