সিলেটি ভাষায় কবিতা | আমারে কেউ কেউ পড়শি ভাবইন | বেলায়েত মাছুম

 


সিলেটি ভাষায় কবিতা ''আমারে কেউ কেউ পড়শি ভাবইন'' এত সাড়া পেয়েছে যে আমি অভিভুত। অনেকে পড়ছেন, অনেকে পড়ে বার্তা পাঠাচ্ছেন। সবকিছু মিলিয়ে আমি আনন্দিত। এই আনন্দ থেকে চিন্তা এলো সিলেটি নাগরী লিপিতে  ঐ কবিতাগুলো লিখলে কেমন হয়? লিখতে গিয়ে কিছু সমস্যায় পড়তে হয়েছে চর্চার অভাবে। তবু চেষ্টা করলাম, প্রচুর ভুল থাকার সম্ভাবনা আছে। গুগল কী বোর্ডে  নাগরী থাকলেও ব্লগস্পট সমর্থন করছে না। তাই ছবি আকারে প্রকাশ করতে বাধ্য হলাম। সকলের প্রতি ভালবাসা। 

লিংক- 

                                            শুনতে-  সাউন্ড ক্লাউড অডিও লিংক

১.
তুমার আত থাকি কুন্তা খাইলে
তুমার চউখো চউখ পড়লে
 আমি টাল অইজাই
পাতা যেলা পরি থাকে ঘাসর উপরে
মনো অয় আমিও পরি থাকি
হারাদিন, বিয়ান থাকি হাইন্জা।
আমার বেইল নাই অইজায়
কোন কামো আর মন বয় না
মনো অয় হাঝর লাখান উইড়া যাই
আর মেঘ অইয়া তুমার উপরে ঝইরা পরি।


২৭/০৯/২০
সুইন্টন

২.
বাড়ির চাইরোবায় মুর্তার ফুল ফুটে
আর অউ ফুল থুকাই থুকাই আমরা বড় অইগেলাম,
হপ্তা ঘুরি ঘুরি শুক্কুরবার আয়
টুপাটুপির ভাত রান্ধা অওয়ার মতো
মাঝ উঠানোর বেইল যেলা যায় যায় করে
ঠিক অউলা আমরা হকল চেছিত বই থাকি।

বাড়ির চাইরোবায় অউ মুর্তার ফুল পরে
আমরা থুকাই আনি মালা গাততাম চাই-
পুতুল খেলার দিনর লাকান
একোদিন করি আমরার দিন কই চলি যায়
অতা ভাবতে ভাবতে বিয়ার দিন সমাগত অয়।

আমরা মুর্তার ফুল থুকাইতে থাকি
ই ফুলে মালা গাথা যায় না,
এমন নরম শরীল কে বানাই দিলো
কই থাকি ই ফুল আমরা বাড়ির চাইরোবায় ফুটে
আমি ই উত্তর পাইতাম করি গোরস্তানও যাই
যেখানো এবলা মানুষ নায় তারা ঘুমাই থাকইন।


২৮/০৯/২০
সুইন্টন

৩.
আম্মায় হুনাইবা গিত
অউ আশা লইয়া এবো হাইন্জা অয়
আস মুরুগ ডাকি ডাকি ঘরো উঠিজায়
গোয়ালাত বান্ধা গরুর লাখান
আমিও তান বায় চাইথাকি।

ইলা দিন কত অইছে গত
জারমুনির তলে নাক বাউঅয়াই পুতি রইছি;
আওরর পানিত , খালর পানিত
মাছ ধরার বাওয়ে শরীলো ফেক মাখিলাইছি।

আম্মায় হুনায়বা গিত
এরলাগি আমরা ভাই-বইন বইথাকি লাগে
রইদ মেঘ সব বাদে হাইন্জা নামে
আমারার উঠানো
অউ আশা লইয়া ঘুমানিত যাই।

২৮/০৯/২০
ওল্ডহাম

৪.
এবলা আমি তোমার থাকিন দূর ঘর বান্দি
বনর পাখিরে হুনাই গিত
ইজলর তলে বইয়া তন্দ্রাত যাই
তোমার বদন আমার চউখো ভায়।

ফুটা ফুটা মেঘ ঝরে
এর লাগি আমি ঘরো থাকি, আর
তোমার ছবি আয়নাত দেখি

ইজলের তলে আজার আজার ফুল
মালা গাততাম করি
তোমার গলা মুখায় চাই
তোমার আত থাকি আমি দূর চলি যাই
আমার ঘর থাকি তোমারে আরাই

১৯/১১/২০
ওল্ডহাম

৫.

আমি যেখানো উবাই
মাথার উপর আসমান থাকে
চান থাকে. হাঝ থাকে
তোমার আত থাকেনা।

আটি আটি কত দূর যাই
সাগরর পাড়ো
পারর উপরে
বনর ভিত্রে
তোমারে পাইনা

আমি যেখানো যাই
হাওয়া ও আয়
ফুলর গনেরা ঘুরে
তোমার চুলর গন পাইনা


১৯/১১/২০২০
ওল্ডহাম

৬.

একটা গাছ থাকি একটা পাতা পরে
দূর থাকি দেখি
কিলা দুলতে দুলতে
বাতাসর লগে নাচতে নাচতে
রংগিলা ধুলার উপর পরে।

কই থাকি অউ বাতাস আয়
গাছর পাতারে ছোয়
ধুলারে উড়াইয়া নেয়

একটা গাছ থাকি আরকটা গাছ দেখি
একটা পাতা আরকটা পাতার উপরে পরে


১৯/১১/২০২০
ওল্ডহাম


৭.
পড়শির ঘর থাকি পড়শির ঘরো যাই
আমার ঘর পাইনা
দূর বিদেশ ঘুরতে ঘুরতে
পড়শির দরজাত উবাই

আমার পাও নাই
পাখনাও নাই
চউখ বন্ধ করি
তবু ঘুরাত যাই

আমারে কেউ কেউ পড়শি ভাবইন
তারার ঘরো দরজা নাই
জানলা নাই
আসমান আছে

আমি তারার দরজাত উবাই
তারারে আমি পড়শি ভাবি
তারা আমারে ভাবইন
এর লাগি দূরই থাকি।


১৯/১১/২০২০
ওল্ডহাম



আরো কিছু সিলেটি কবিতা-

আমি শরম মুখে মাততে আছি